غرائب وعجائب

تبرڭيڭ

معلومة تهمك

جمالك سيدتى

بغيت نخوي عليكم قلبي راه غانطرطق بالفقصة و نموت

منشورات Unknown | |

بغيت نخوي عليكم قلبي راه غانطرطق بالفقصة و نموت 

السلام عليكم ورحمة الله و بركاته
انا راجلي تزوجت بيه عن حب دابا عامين باش مزوجين و رزقني الله معاه بولد الحمد لله كيتهلا فينا و كيبغيني و كيبغي ولده و لكن فيه واحد الطبع خايب بزاف وهو ملي كيتعصب ما كيعفرش اش كيقول لي جاته في فمه يقولها ويهين ويجرح بدون ادنى انسانية كيسمعني خل ودنيا و يخليني باغية نطرطق في البداية كنت تنجاوبه و تنغوت حتى انا وشفته عاما كيزيد يتعصب لدرجة كيبغي يضربني وشحال من مرة كيشير عليا بشي لعبة ولا قرعة البلاستيك ولا شي حاجة فيديه واخا ما كيضربش بالجهد ولكن كنقول مع راسي شي نهار يفلق ليا نيت من كيدير معايا هاد التصرفات كيرجع يتنادم معاه الحال ويجي يحزر ليا ويرغبني نسامحه و كنسامحه دغيا حيت كنبغيه و كنقول غي معصب اما ما يقولش ليا ديك الهدرة لانه فاش تيكون مهدن و تيكون مرتاح كيسمعني كلام زوين و كيعاملني احسن معاملة ويعاوني فشغل الدار ويطيب الفطور فهاد رمضان شي مرات و يعاوني فالولد ويشاورني حتى الا عرضاتنا اخته ما يقدرش يجاوبها الا ما تشاور معايا الا قلت نمشيو نمشيو الا قلت لا كيتقبل عادي كيقولها حتى لمرة اخرى ولكن ملي يتعصب و المشكل على اقل سبب يقدر يتعصب شي مرات ما تنتوقعش انه غايتعصب حتى كيصدمني ويبدا يغوت ما تنفهم فيه والو وتيكون السبب تافه مثلا ما هزيتش المواعين دغيا اولا خليت الولد تيبكي تيجي يغوت ويشبعني معيار وشوية تيرجع يبرد ويجي يعنقني ويقولي ما تبقايش ديري هاد التصرفات لي كتعصبني تنقولو انا ما تنعرفش اشنو تيعصبك ولو نكون غالطة خاص رد الفعل يكون على قد التصرف ماشي انت تتسب و تعاير بحالي ما عرفت اشنو درت تيقولي غلطت ما بقيتش نتعصب عليك هاكا ويستسمحني و تنسمح ليه دغيا وليت كنقرا على الزوج العصبي وكيفاش نتعامل معاه لقيت ان داك ردان الهدرة غي كيزيد يشعل العافية وليت كنسكت ليه ونخليه يعاير حتى يشبع ويمشي المهم ما كيزيدش يشعل بحال الاول و كنرد البال مزيان لاي حاجة تقدر تعصبه كنتجنبها واخا تكون ما شي شي حاجة لي تستاهل العصبية فقط بمجرد اني نتوقع يقدر يتعصب كندير بالناقص المهم هادي شي اسبوع كنت انا معصبة مع الولد ما كيخليني ندير والو وكيبكي بزاف و هو قالك ما تخليهش يبكي مرة يهزه مرة يجيبه ليا وانا عيانة مع الرضاعة و كنصوم ما كنكمل النهار غي بزز وهاد السيمانة حتى راجلي عيا مع الولد باغي غي الهزان ولا كيخليه ليا بزاف وانا تعصبت وعييت وليت كنتنفخ على راجلي و نقوله شد ولدك راني ما فياش لي يهز يديا واحد النهار قاليا هاكي الولد وكنت يلاه عطيته ليه و بديك الضغط لي عليا كنت شادة شي حاجة فيدي وخبطتها مع الارض و نضت البيت لاخر بكيت حتى شبعت بلا ما يشوفني و خرجت شديت الولد موراها وليت ميكة عليه و حتى هو ميك عليا و مع هو لي تيوجد السحور وتيجي يفيقني حيت انا تنبقا سهرانة مع الولد تيرضع كل مرة المهم بلاصت يحركني ولا يعيت ليا نفيق كيهز شي لعبة ولا شي شال ولا مخدة صغيرة و يرميها عليا كنفيق مخلوعة زعمة راه تيفيقني وما راضيش هادي شي 4 ايام فاق ببسحور وجده وفيقني بنفس الطريقة نضت تسحرت و مشيت هزيت القران و دخلت بيت اخر و بديت نقرا وخليت المواعين قلت حتى نسالي الورد و نهزهم شوية جا وقف عليا و بدا بالمعيار واش انتي مرا لي مخلية المواعن فبلاصتهم بغيتيني نهزهم ليك انا خدام عندك ولا شنو اش هاد التصرفات الحيوان لي حيوان وما يديرهاش انتي ماشي ديال الاحترام قلت ليه بكل برود انا غانوض نهزهم قالي نوضي دابا هزيهم وغي تصاب رمضان اما نوريك اش غاندير فيك و مشا وبقيت انا مصدومة و كنبكي ونضت بدموعي جمعت المواعين ورجعت كملت قرايتي و صليت و نعست بدموعي الغد ليه ما خرجتش من بيت النعاس _ مع العلم هو فهاد الصيف كينعس فبيت اخر حيت انا ما تنبغيش نحل السراجم على قبل الصداع دالشارع كيفيق لي الولد وهو كيجيه الصهد ماشي هاجرني _ المهم بقيت فالبيت النهار كله و مولف هو غي تنفيق انا وولده كنمشيو حداه و يبقى يلعب مع ولده واخا كنكون مقلقة منه هاد المرة ما وصلتوش بالمرة قررت ناخد موقف قاصح باش يحتارمني شوية و شديت ولدي عندي حاولت ندير معاه الخاطر و الحمد لله ما برزطنيش فالعشية نضت طيبت الفطور ووجدت داك الشي لي قسم الله و الولد في ظهري شوية جا الراجل قالي وجدي راسك نمشيو نفطرو في الجردة ما جاوبتوش انا دخلت البيت وجلست شوية جا عندي قالي واش ما سمعتيش ما جاوبتوش و مشا البيت لاخر حتى قرب الاذان حط الطابلة و جا عندي قالي نوضي تفطري مشيت فطرت وهزيت المواعين غسلتهم و دخلت البيت تاني فالسحور جا لقاني فايقة شوية نضت تسحرت و جمعت الواعن وهزيت المصحف و جا هوا مورايا وعنقني وبقا يبوس لي فجبهتي وراسي ما درت حتى رد فعل كملت طريقي و قريت القران ومشيت نعست الغد جاني للبيت قاليا حتى لاين تبقاي معتاكفة زعمة كيضحك معايا ما جاوبتوش درت تاني الفطور جا باس ليا راسي و قالي يلاه بفطرو فالجردة قلت له دبر راسك جمع المواعين و الفراش وخرجنا ملي رجعنا جا عاوتاني كيعنق فيا و يبوس وانا من هاد الشي كولو ما قااداش ننسا ديك الليلة و قلبي عمر بزاف و خفت غي نسامحه تاني يرجع يدير نفس التصرفات دابا هادي 4 ايام وهو كيتقرب و يحزر واخا ما قالش سمحي ليا بصورة مباشرة و لكن تصرفاته كتدل عليها
دابا انا ماعرفت واش نسامح ليه ولا نبقا هازة فقلبي مع اني متاكدة غايبقا كل مرة يحزر فنصحوني وبينو لي عيوبي و عيوبه و كيفاش نتعامل معاه الله يخليكم
سمحو لي طولت عليكم بزاااف ولكن محتاجة نخرج لي فقلبي حيت ما تنعاود لحتى شي حد نهائيا
مصدر المشكل مطروح في الصفحة الرسمية للموقع عبر الفيسبوك


منشور بقسم

مواضيع دات صلة وتهمك ايضا

Recent Posts Thumbnails Blogger Widget
;